Ամփոփիչ քննարկում Նոյեմբերյանի և Սևքարի տեղամասի Նոյեմբերյանի անձնակազմի հետ
ՇՄՆ էկոպարեկային ծառայության պետ Վլադիմիր Կիրակոսյանի գլխավորած աշխատանքային խումբը հագեցած գրաֆիկով հանդիպումներ է անցկացրել Տավուշի մարզում, քննարկումներ ունեցել Ծառայության մարզային վարչության բոլոր տեղամասերի անձնակազմերի հետ:
Ամփոփիչ քննարկումը կայացավ Կողբ համայնքում մարզային վարչության Նոյեմբերյանի և Սևքարի տեղամասի Նոյեմբերյանի անձնակազմի հետ:
Հանդիպում-քննարկման ընթացքում մանրամասն քննարկվեցին անտառների և բնության հատուկ պահպանվող տարածքների, ինչպես նաև էկոհամակարգերի ու կենսաբազմազանության պահպանության ընթացիկ խնդիրներն ու ձեռքբերումները:
Տավուշի մարզը հայտնի է որպես Հայաստանի ամենաանտառապատ մարզ, ինչը լրացուցիչ պատասխանատվություն և զգոնություն է ենթադրում պահպանություն իրականացնող աշխատակիցների համար:
Վլադիմիր Կիրակոսյանի խոսքով՝ այս մարզում պահպանության նշաձողը պետք է լինի ավելի բարձր, քանի որ ամեն մի իրավախախտում կամ անպատասխանատու գործողություն կարող է անմիջապես ազդել բնական միջավայրի, տեղական էկոհամակարգերի և կենսաբազմազանության վրա։
Ծառայողները ներկայացրեցին իրենց կողմից հայտնաբերված իրավախախտումները, գույքագրված խնդիրները, խոսեցին նաև ազգաբնակչության հետ հաղորդակցման և բնության պահպանության հարցում համագործակցության կարևորության մասին:
Հանդիպման ընթացքում քննարկվեցին նաև տեղամասի տեխնիկական միջոցների վերազինման և ռեսուրսների արդյունավետ օգտագործման հնարավորությունները։
Վլադիմիր Կիրակոսյանն էլ իր խոսքում վստահություն հայտնեց, որ մարզային վարչության ամբողջական տեխնիկական վերազինման պարագայում պահպանության գործառույթն առավել կանոնակարգված և պատշաճ կիրականացվի, սակայն պետք է խստորեն պահպանել մշտադիտարկման ընթացակարգերը,
բարձրացնել համայնքային իրազեկման միջոցառումների արդյունավետությունը,
նպատակային օգտագործել ռեսուրսները և բացառել կոռուպցիոն ցանկացած դրսևորում:
Հանդիպման ավարտին հարց ու պատասխանի ձևաչափով ներկայացվեցին աշխատանքային գործունեության ընթացքում գույքագրված խնդիրները, քննարկվեցին հնարավոր լուծումները:
Պատկերասրահ
