Աշխատանքային հանդիպում Տավուշի մարզպետի հետ
Շրջակա միջավայրի նախարարության էկոպարեկային ծառայության պետ Վլադիմիր Կիրակոսյանի գլխավորած աշխատանքային խումբը մեկնել է Տավուշի մարզ՝ մի շարք հանդիպումներ անցկացնելու նպատակով։
Այցի շրջանակում Ծառայության ղեկավարը Տավուշի մարզպետարանում աշխատանքային հանդիպում է ունեցել մարզպետ Հայկ Ղալումյանի հետ։
Կողմերը բարձր են գնահատել նմանատիպ պարբերական հանդիպումների կարևորությունը և վերահաստատել փոխադարձ համագործակցության ու գործընկերային հարաբերությունների ամրապնդման պատրաստակամությունը։
Վլադիմիր Կիրակոսյանը հատուկ ընդգծել է, որ Հայաստանի անտառածածկ տարածքների զգալի մասը գտնվում է Տավուշի մարզում։ Այդ հանգամանքը բազմապատկում է պատասխանատվությունը՝ տվյալ տարածքի պահպանությունը կազմակերպելու առավել զգոն, հետևողական ձևով։
Էկոպարեկային ծառայության ղեկավարը վստահություն է հայտնել, որ մարզային վարչության լիարժեք համալրումն ու տեխնիկական վերազինումը հնարավորություն կտան առավել արդյունավետ իրականացնել անտառների և բնության հատուկ պահպանվող տարածքների պահպանության գործընթացները։
Հայկ Ղալումյանն իր հերթին շեշտել է Տավուշի եզակի բնաշխարհի արժեքը և նշել, որ դրա պատշաճ պահպանությունն ու պահպանության մեխանիզմների զարգացումը լրջագույն և պատասխանատու պարտականություն է։
Այցի կարևոր բաղադրիչներից է դարձել նաև համագործակցության նոր գործիքների և մեխանիզմների մշակման ու զարգացման գործընթացը, որը միտված է մարզում ապահովել բնապահպանական հսկողության համակարգի առավել համակարգված, նպատակային և արդյունավետ գործունեություն։
Ընդգծվել է, որ ձեռնարկվող միջոցառումները պետք է նպաստեն հանրության հետ բաց ու շարունակական երկխոսության խորացմանը, տարածքային բնապահպանական խնդիրների լիարժեք գույքագրմանը և էկոլոգիական օրակարգի շուրջ հանրության իրազեկման ու պատասխանատվության մակարդակի բարձրացմանը։
Պատկերասրահ
