Դեպի COP17․ Կենսաբազմազանության համաշխարհային օրակարգում Հայաստանի ձայնը

Այսօր Ամերիկյան համալսարանի Մանուկյան սրահում մեկնարկեց միջազգային համաժողովը՝ «Ճանապարհ դեպի COP17․ Գլոբալ կենսաբազմազանության օրակարգը և Հայաստանի դերը» խորագրով։

Քննարկման առանցքում է Կունմին-Մոնրեալի գլոբալ կենսաբազմազանության շրջանակը (Kunming-Montreal Global Biodiversity Framework), որի տեսլականն է՝

«Աշխարհ, որտեղ մարդն ապրում է ներդաշնակ բնության հետ մինչև 2050 թվականը»։

Այս շրջանակը սահմանում է 23 թիրախ մինչև 2030 թվականը՝

կենսաբազմազանության կորստի դադարեցման,

բնության վերականգնման,

մարդկության ու էկոհամակարգերի փոխշահավետ հարաբերությունների վերակերտման ուղղությամբ։

Թիրախ 3-ը, որը հայտնի է որպես «30×30», կոչ է անում մինչև 2030 թվականը աշխարհի ցամաքային, ջրային և ծովային տարածքների առնվազն 30%-ը պահպանել և արդյունավետորեն կառավարել։ Սա համաշխարհային մակարդակով ամենահավակնոտ բնապահպանական նպատակներից է։

Բացի պետական պահպանվող տարածքներից, հատուկ կարևորություն է տրվում նաև OECM-ներին (Other Effective Area-Based Conservation Measures)՝ այն տարածքներին, որտեղ կենսաբազմազանությունը պահպանվում է առանց դասական արգելոցային կարգավիճակի, բայց արդյունավետ կառավարման շնորհիվ։

Միջոցառման առանցքային թեմաներն անմիջականորեն համահունչ էին շրջակա միջավայրի նախարարության էկոպարեկային ծառայության գործունեության առաջնահերթություններին՝ ուղղված կենսաբազմազանության և էկոհամակարգերի պահպանությանն ու բնապահպանական հսկողության արդյունավետության բարձրացմանը։

Հայաստանի համար սա նոր հնարավորություն է՝ իր փորձը և հնարավորությունները ներդնելու կենսաբազմազանության պահպանության գլոբալ ցանցում, միաժամանակ ձևավորելով ազգային ռազմավարություն, որը համահունչ է ԵՄ և միջազգային գործընկերների առաջնահերթություններին։

Միջոցառմանը մասնակցում են միջազգային և տեղական փորձագետներ՝ ներառյալ Գերմանիայի կառավարության, ԵՄ պատվիրակության, ՄԱԿ-ի և համաշխարհային բնապահպանական կազմակերպությունների ներկայացուցիչները։ Մասնակիցների շարքում էին նաև շրջակա միջավայրի նախարարի տեղակալ Արամ Մեյմարյանը, էկոպարեկային ծառայության կառուցվածքային ստորաբաժանումների ղեկավարներ։