էկոպարեկային ծառայության պետն աշխատանքային հանդիպում է ունեցել Սյունիքի մարզպետի հետ
ՇՄՆ էկոպարեկային ծառայության պետ Վլադիմիր Կիրակոսյանի գլխավորած աշխատանքային խումբը Սյունիքի մարզում է:
Ծառայության պետը Սյունիքի մարզպետարանում հանդիպում է ունեցել մարզպետ Ռոբերտ Ղուկասյանի հետ:
Ողջունելով հերթական աշխատանքային հանդիպման կազմակերպումը՝ երկուստեք վերահաստատվել է համագործակցության հանձնառությունը:
Վլադիմիր Կիրակոսյանը նշել է, որ Սյունիքի մարզ այցի նպատակն է էկոպարեկային ծառայության Սյունիքի մարզային վարչության գործունեության շրջանակներում մոնիթորինգային աշխատանքների իրականացումը՝ ուղղված վարչության գործառույթների վերլուծությանը, ընթացիկ գործընթացների գնահատմանը, ինչպես նաև ապագա քայլերի ավելի արդյունավետ պլանավորմանը։
Ծառայության ղեկավարն ընդգծել է, որ Սյունիքի մարզն ունի ոչ միայն ռազմավարական նշանակություն, այլ նաև առանձնահատուկ տեղ՝ պայմանավորված այն հանգամանքով, որ էկոպարեկային ծառայության առաջին մարզային վարչությունը պաշտոնապես գործարկվել է հենց այստեղ և դիտարկվում է որպես կառույցի ինստիտուցիոնալ զարգացման մեկնակետ։
Ռոբերտ Ղուկասյանն էլ իր խոսքում նշել է, որ հասարակության շրջանում ձևավորվել է դրական վերաբերմունք էկոպարեկային ծառայության նկատմամբ: Մարզպետի խոսքով՝ շատ քաղաքացիներ հետաքրքրված են ծառայության շարքերում ներգրավվածությամբ։
Կողմերը վերահաստատել են մարզի բնակչության հետ իրազեկման աշխատանքների կազմակերպման կարևորությունը, ինչը միտում ունի կատարելագործել ազգաբնակչության գիտելիքները բնության հատուկ պահպանվող տարածքներին և անտառներին չվնասելու տեսանկյունից, գործող օրենսդրական և իրավական սահմանափակումների, բնության նկատմամբ անհատական և հանրային պատասխանատվության բարձրացման անհրաժեշտության, գործող խնդիրների ճանաչման, լուսաբանման և հանրային ընկալումների ճշգրտման գործընթացի տեսանկյունից: Այս միջոցառումները պետք է նպաստեն հանրության հետ երկխոսության խորացմանը, տարածքային բնապահպանական խնդիրների գույքագրմանը և էկոլոգիական օրակարգի շուրջ ավելի իրազեկ ու պատասխանատու հանրային դիրքորոշումների ձևավորմանը։
Էկոպարեկային ծառայության պետն անդրադարձել է նաև Ծառայության տարածքային կառավարման մոդելի շարունակական կատարելագործման անհրաժեշտությունը, ապա նշել է, որ էկոպարեկային ծառայության ներկայությունը մարզում հանրային ներգրավվածության և վստահության հիմքով պատասխանատու գործընկերության կարևոր դրույթներից է։
Պատկերասրահ
