Էկոպարեկային ծառայությունն ընդլայնում է թիմը

ՇՄՆ էկոպարեկային ծառայությունը հետևողականորեն շարունակում է իր ստորաբաժանումների հզորացման և պրոֆեսիոնալ կադրերի ներգրավման գործընթացը։

Այս համատեքստում՝ օրերս կայացել են մրցութային քննություններ՝ Կոտայքի և Գեղարքունիքի մարզային վարչության Հրազդանի և Սևանի տեղամասերում հերթափոխի տեսուչների թափուր հաստիքները համալրելու նպատակով։

Բնական էկոհամակարգերի պահպանության և հսկողության առաջնագծում գտնվող այս կարևորագույն տեղամասերի կադրերի ընտրությունն անցել է որոշակի փուլերով.

մասնագիտական պատրաստվածություն. ստուգվել է դիմորդների տեսական գիտելիքների բազան՝ բնապահպանական օրենսդրության և իրավական կարգավորումների տիրապետման ուղղությամբ,

անձնային հմտություններ. հատուկ ձևավորված հանձնաժողովի կողմից փորձաքննվել է թեկնածուների հոգեբանական պատրաստվածությունը, ճգնաժամային իրավիճակներում կողմնորոշվելու ճկունությունը, էթիկայի կանոնների պահպանումն ու սթրեսակայունությունը։