Հանդիպում-քննարկում Լոռու մարզային վարչության Թումանյանի անձնակազմի հետ
ՇՄՆ էկոպարեկային ծառայության պետ Վլադիմիր Կիրակոսյանի գլխավորած աշխատանքային խմբի հաջորդ կանգառը Լոռու մարզի Ալավերդի բնակավայրն էր, որտեղ Ծառայության ղեկավար Վլադիմիր Կիրակոսյանը և պետի տեղակալ Մուրադ Նուրիջանյանը հանդիպում-քննարկում են ունեցել Ծառայության Լոռու մարզային վարչության Թումանյանի անձնակազմի հետ:
Ողջունելով ներկաներին՝ Ծառայության ղեկավարը նախ շնորհավորել է տեղամասի պատասխանատու Հայկ Սիմոնյանին՝ նշանակման կապակցությամբ, հաջողություններ մաղթել նրան ստանձնած պատասխանատու գործում, ապա դիմելով ներկաներին, ընդգծել է, որ իր մարզային այցերը շարունակական բնույթ են կրելու և կազմակերպվելու են բազմաթիվ հանդիպում-քննարկումներ՝ նպատակ ունենալով տեղամասի աշխատակիցների կողմից իրենց աշխատանքային գործունեության ընթացքում գույքագրված խնդիրներին անձամբ տեղում ծանոթանալ:
Կիրակոսյանը նաև նշել է, որ Լոռու մարզային վարչության համալրման և պաշտոնական գործարկման աշխատանքները նախատեսվում է մեկնարկել 2026 թվականի առաջին եռամսյակին և այս համատեքստում նա անդրադարձել է նաև կրտսեր էկոպարեկի հաստիքների թվաքանակի ավելացմանը և շեշտել, որ այդ հաստիքների թվաքանակի ավելացման նպատակը մեկն է՝ պահպանության ոլորտում բազմամյա աշխատանքային փորձ ունեցող աշխատակիցներին, ովքեր լավ են տիրապետում իրենց գործին, սակայն չունեն բարձրագույն կրթություն, կարողանան աշխատել և ցանկության ու հնարավորության դեպքում էլ նախաձեռնողականություն ցուցաբերեն բարձրագույն կրթություն ստանալու հարցում:
«Մենք ապագա սերունդներին առողջ բնություն և հարուստ կենսաբազմազանություն փոխանցելու կարևորագույն առաքելություն ունենք և այդ առաքելությունը պետք է իրականացնենք պատշաճ»,-ասել է Կիրակոսյանը, ապա հավելել՝ առանձնահատուկ ուշադրություն պետք է դարձնենք նաև պահպանվող տարածքների մաքրությանը և պարբերական շաբաթօրյակներ կազմակերպենք:
Նա նաև անդրադարձել է անտառամերձ բնակավայրերի բնակչությանը թափուկ վառելափայտի տրամադրման գործընթացին և Ծառայության կողմից իրականացվող հսկողությանը: Կիրակոսյանը կարևորել է ազգաբնակչության հետ դինամիկ հաղորդակցումը և նրանց հետ ևս աշխատանք տանելու, իրազեկելու անհրաժեշտությունը։
Հանդիպումն ամփոփվել է հարց ու պատասխանի ձևաչափով՝ աշխատանքային գործունեության ընթացքում գույքագրված խնդիրների, հնարավոր լուծումների քննարկմամբ:
Պատկերասրահ
