Կայացել է աշխատանքային քննարկում Լոռու մարզային վարչության Ստեփանավանի անձնակազմի հետ
ՇՄՆ էկոպարեկային ծառայության պետ Վլադիմիր Կիրակոսյանի գլխավորած աշխատանքային խմբի հաջորդ կանգառը Լոռու մարզի Ստեփանավան քաղաքն էր, որտեղ անցկացվեց աշխատանքային հերթական քննարկումը էկոպարեկային ծառայության Լոռու մարզային վարչության Ստեփանավանի անձնակազմի հետ:
Ողջունելով ներկաներին՝ Ծառայության ղեկավարը նշել է, որ մարզային այցելությունները շարունակական բնույթ են կրում՝ նպատակ ունենալով տեղամասի աշխատակիցների կողմից իրենց աշխատանքային գործունեության ընթացքում գույքագրված խնդիրներին խորքային ծանոթանալ, հնարավոր լուծումներ գտնել:
Կիրակոսյանի խոսքով՝ Լոռու մարզային վարչության համալրման և պաշտոնական գործարկման աշխատանքները նախատեսվում է մեկնարկել 2026 թվականի առաջին եռամսյակին և վարչության ամբողջական համալրումը միտված է լուծելու ոչ միայն մարզի անտառների և բնության հատուկ պահպանվող տարածքների պահպանության հարցը, այլ նաև մարզի բնակչության սոցիալական խնդիրները՝ ապահովելով հետաքրքիր ու դինամիկ աշխատանք՝ գրավիչ աշխատավարձով և սոցիալական երաշխիքներով:
Ծառայության պետն անդրադարձել է նաև կրտսեր էկոպարեկի հաստիքների թվաքանակի ավելացմանը և ընդգծել, որ այդ հաստիքների թվաքանակի ավելացմամբ նոր հնարավորություններ են ստեղծվում պահպանության ոլորտում բազմամյա աշխատանքային փորձով, բայց ոչ բարձրագույն կրթությամբ աշխատակիցների համար:
Հաջորդիվ Կիրակոսյանը նշել է, որ անտառների և բնության հատուկ պահպանվող տարածքների պահպանություն իրականացնողներն ապագա սերունդներին առողջ բնություն, հարուստ կենսաբազմազանություն և ավելի լավ շրջակա միջավայր փոխանցելու կարևորագույն առաքելություն ունեն և հավելել, որ ուշադրություն պետք է դարձնել նաև պահպանվող տարածքների մաքրությանը և պարբերական շաբաթօրյակներ կազմակերպել:
Հանդիպում-քննարկման ավարտին հարց ու պատասխանի ձևաչափով ներկայացվել են աշխատանքային գործունեության ընթացքում գույքագրված խնդիրները, քննարկվել են հնարավոր լուծումները:
Պատկերասրահ
