Լոռու մարզ կատարած այցի շրջանակում կայացավ հերթական հանդիպում-քննարկումը
ՇՄՆ էկոպարեկային ծառայության պետ Վլադիմիր Կիրակոսյանի գլխավորած աշխատանքային խմբի Լոռու մարզ կատարած այցի շրջանակում կայացավ հերթական հանդիպում-քննարկումը: Այս անգամ Ծառայության պետի գլխավորությամբ անցկացվեց աշխատանքային ընդլայնված քննարկում Վանաձոր քաղաքում՝ Լոռու մարզային վարչության Վանաձորի տեղամասի անձնակազմի հետ:
Ողջունելով գործընկերներին՝ Վլադիմիր Կիրակոսյանը նշել է, որ ինչպես իր, այնպես էլ Ծառայության տարբեր ստորաբաժանումների ներկայացուցիչների մարզային այցելությունները շարունակական բնույթի են՝ նպատակ ունենալով տեղամասի աշխատակիցների կողմից իրենց աշխատանքային գործունեության ընթացքում գույքագրված խնդիրներին ծանոթանալ, հնարավոր լուծումներ գտնել:
Կիրակոսյանը նաև նշել է, որ Լոռու մարզային վարչության համալրման և պաշտոնական գործարկման աշխատանքները նախատեսվում է մեկնարկել 2026 թվականի առաջին եռամսյակին և այս համատեքստում նա անդրադարձել է նաև կրտսեր էկոպարեկի հաստիքների թվաքանակի ավելացմանը և շեշտել, որ այդ հաստիքների թվաքանակի ավելացման նպատակը ոլորտի հարուստ աշխատանքային փորձով աշխատակիցներին, ովքեր լավ են տիրապետում իրենց գործին, սակայն չունեն բարձրագույն կրթություն, հնարավորություն ընձեռելն է աշխատել և հետագայում էլ արդեն ցանկության ու հնարավորության դեպքում նաև բարձրագույն կրթություն ստանալու հարցում նախաձեռնողականություն ցուցաբերելը:
«Մենք ապագա սերունդներին առողջ բնություն, հարուստ կենսաբազմազանություն և ավելի լավ շրջակա միջավայր փոխանցելու կարևորագույն առաքելություն ունենք և այդ առաքելությունը պետք է իրականացնենք պատվով, ուրախ լինենք, որ մեզ բախտ է վիճակվել հենց այս աշխատանքն անել»,-ասել է Կիրակոսյանը, ապա հավելել՝ ուշադրություն պետք է դարձնենք նաև պահպանվող տարածքների մաքրությանը և պարբերական շաբաթօրյակներ կազմակերպենք:
Կիրակոսյանն անդրադարձել է Ծառայությունում կանանց ներգրավվածությանը և շեշտել՝ ուրախ է, որ բավականին շատ իգական սեռի ներկայացուցիչներ են հետաքրքրված անտառների և բնության հատուկ պահպանվող տարածքների պահպանությամբ:
Ծառայության ղեկավարը անդրադարձել է նաև անտառամերձ բնակավայրերի բնակչությանը թափուկ վառելափայտի տրամադրման գործընթացին և Ծառայության կողմից իրականացվող հսկողությանը: Կիրակոսյանը կարևորել է ազգաբնակչության հետ դինամիկ հաղորդակցումը և նրանց հետ ևս աշխատանք տանելու, իրազեկելու անհրաժեշտությունը։
Հանդիպում-քննարկման ավարտին հարց ու պատասխանի ձևաչափով ներկայացվել են աշխատանքային գործունեության ընթացքում գույքագրված խնդիրները, քննարկվել են հնարավոր լուծումները:
Պատկերասրահ
