Մեկնարկել է «Աղետների կառավարման կարողությունների զարգացման» սեմինարը

Այսօր՝ հուլիսի 15-ին, մեկնարկել է «Աղետների կառավարման կարողությունների զարգացման» սեմինարը, որը անցկացվում է  Ներքին գործերի նախարարության, ՀՀ-ում ԱՄՆ դեսպանության և ԱՄՆ Անվտանգային կառավարման ինստիտուտի համատեղ ջանքերով և որի առանցքային նպատակն է խթանել բազմաշերտ համագործակցությունը՝ համադրելով միջազգային փորձառությունը, ազգային կառույցների մասնագիտական պոտենցիալը և աղետների կառավարման ոլորտում համապարփակ ու իրատեսական լուծումների համատեղ մշակման հանձնառությունը։

Միջոցառումը մեկնարկել է ամերիկյան կողմի ներկայացուցիչների՝ Դիաննա Ակուրիոյի, Ջիմի Մարփլի, Բրայան ՎանԲոկերնի և մյուս մասնագետների ողջույնի խոսքերով։ Այնուհետև ընթացան բաց ձևաչափով քննարկումներ՝ փորձի համատեղ վերլուծությամբ և տեղեկատվության ազատ փոխանակմամբ։

Մասնակիցների ցանկում էին շրջակա միջավայրի նախարության, այդ թվում՝ էկոպարեկային ծառայության, պաշտպանության, առողջապահության, ներքին գործերի, ֆինանսների, տարածքային կառավարման և ենթակառուցվածքների նախարարությունների, ինչպես նաև Կադաստրի կոմիտեի և ՀՀ Գիտությունների ազգային ակադեմիայի ներկայացուցիչներ։

Օրը հագեցած էր ռազմավարական դիտարկումներով և կոնկրետ ոլորտային հարցերով, որոնք ուղղված էին աղետների հանդեպ դիմադրողականության բարձրացմանն ու ռիսկերի գնահատման արդի մոտեցումներին։ Քննարկվել են խոցելի տարածքների նույնականացմանը, տեղական առաջնահերթություններին, սպառնալիքների կանխատեսման և կառավարման ծրագրերին (հատկապես բարձր մագնիտուդով երկրաշարժերի), ժամանակավոր կացարանների տրամադրման պետական քաղաքականությանը, անտառային հրդեհների մեղմման մեխանիզմներին, ինչպես նաև ֆինանսական ռեսուրսների առավել արդյունավետ բաշխման հնարավորություններին վերաբերող հարցեր։

Մասնակիցներն անդրադարձել են նաև տվյալների մշակման և վերլուծության նշանակությանը՝ ընդգծելով պատմական փաստերի հիման վրա վտանգների գույքագրում իրականացնելու անհրաժեշտությունը։ Բարձրաձայնվել են հանրային իրազեկման, գիտակցության ձևավորման և տեղեկատվության հասանելիության խնդիրները՝ որպես աղետների կանխարգելման և արձագանքման անբաժանելի մաս։

Արձագանքելով միջազգային գործընկերների հարցին՝ թե ինչ սպառնալիքներ են առավել բնորոշ Հայաստանին, տեղական գերատեսչությունների ներկայացուցիչները նշել են երկրաշարժերը՝ որպես սեյսմիկ ակտիվ գոտու հիմնական ռիսկերից մեկը։ Բացի այդ, առանձնացվել են նաև սողանքները, ջրհեղեղները, երաշտներն ու անտառային հրդեհները։ Տեխնոգեն սպառնալիքներից ուշադրություն է դարձվել արդյունաբերական վթարներին, քիմիական արտահոսքներին և տրանսպորտային պատահարներին։ Կլիմայական փոփոխությունների համատեքստում ևս բարձրացվել են եղանակային ծայրահեղությունների աճի հետ կապված նոր սպառնալիքները։ Անտառային հրդեհների թեմային իր մասնագիտական դիտարկումներով առանձնահատուկ անդրադարձել է ՇՄՆ էկոպարեկային ծառայության կենդանական և բուսական աշխարհին պատճառված վնասի հաշվարկի և վերլուծության վարչության պետ Էդուարդ Կարապետյանը՝ շեշտելով ոչ միայն ծառայության լիազորությունների կարևորությունը, այլև միջազգային փորձի կիրառման և նորարարական լուծումների որոնման անհրաժեշտությունը։ Այս համատեքստում ներկայացվել է նաև անտառային հրդեհների սիմուլյացիոն սեղանիկի գաղափարը՝ որպես ոլորտում նոր մոտեցում՝ կանխարգելման և կառավարման կարողությունները ուժեղացնելու ուղղությամբ։