Շարունակվում են աշխատանքային հանդիպում-քննարկումները մարզային վարչություններում
ՇՄՆ էկոպարեկային ծառայության պետ Վլադիմիր Կիրակոսյանի գլխավորած աշխատանքային խմբի հաջորդ կանգառն Արագածոտնի մարզն էր, որտեղ Ծառայության ղեկավարի գլխավորությամբ հանդիպում-քննարկում է եղել էկոպարեկային ծառայության Շիրակի և Արագածոտնի մարզային վարչության Արագածոտնի տեղամասի անձնակազմի հետ։
Հանդիպման մեկնարկին Ծառայության ղեկավարը ողջունել է ներկաներին և նշել է, որ մարզային այցելությունները հնարավորություն են ընձեռում հենց տեղում տեղամասի աշխատակիցների կողմից իրենց աշխատանքային գործունեության ընթացքում գույքագրված խնդիրներին խորքային ծանոթանալ, հնարավոր լուծումներ գտնել: Նա նշել է նաև, որ Շիրակի և Արագածոտնի մարզային վարչության համալրման և պաշտոնական գործարկման աշխատանքները նախատեսվում է մեկնարկել 2026 թվականի երկրորդ եռամսյակին։
Կիրակոսյանը տեղեկացրել է նաև, որ առաջիկայում նախատեսվում է ավելացնել կրտսեր էկոպարեկների հաստիքների թվաքանակը և նշել, որ այդ հաստիքների թվաքանակի ավելացումը թույլ կտա պահպանության ոլորտում բազմամյա աշխատանքային փորձով, բայց ոչ բարձրագույն կրթությամբ աշխատակիցներին շարունակել իրենց աշխատանքը: Ծառայության պետը շեշտել է նաև, որ բնությունը բոլորինս է, պետք է վերաբերվենք մեր բնությանն այնպես, ինչպես մեր ընտանիքներին:
«Մեր ապագա սերունդների հանդեպ պարտք ունենք, մենք պետք է նրանց լավ շրջակա միջավայր, հարուստ կենսաբազմազանություն փոխանցենք»,- ասել է Կիրակոսյանը և այս համատեքստում արժևորել էկոպարեկային ծառայողի աշխատանքը։ «Անտառների և բնության հատուկ պահպանվող տարածքների պահպանություն իրականացնելը բացի պատասխանատու և չափազանց կարևոր աշխատանք լինելուց նաև հետաքրքիր է ու գրավիչ։ Այն անձինք, ովքեր անցնում են աշխատանքի Ծառայությունում, ունենում են հետաքրքիր ու դինամիկ աշխատանք՝ գրավիչ աշխատավարձով և սոցիալական երաշխիքներով»,- նշել է Վլադիմիր Կիրակոսյանը՝ հավելելով, որ ուշադրություն պետք է դարձնել նաև պահպանվող տարածքների մաքրությանը և պարբերական շաբաթօրյակներ կազմակերպել:
Հանդիպում-քննարկման ավարտին հարց ու պատասխանի ձևաչափով ներկայացվել են աշխատանքային գործունեության ընթացքում գույքագրված խնդիրները, քննարկվել են հնարավոր լուծումները:
Պատկերասրահ
