ՇՄՆ էկոպարեկային ծառայության մասնակցությունը միջազգային կանաչ գործընկերության ամրապնդման հարցում
2025 թվականի հոկտեմբերի 15-ը դարձավ կենսունակ բնապահպանական գործընկերության վկայությունը Երևանի բուսաբանական այգում, որտեղ տեղի ունեցավ «Համերաշխության ծառուղի» խորհրդանշական հատվածի հիմնադրումը։ Միջոցառումը նվիրված էր Միավորված ազգերի կազմակերպության Պարենի ու գյուղատնտեսության կազմակերպության 80, ինչպես նաև Երևանի բուսաբանական այգու 90-ամյակներին։
Կառավարության, դիվանագիտական կորպուսի, ՄԱԿ-ի կառույցների և տեղական բնապահպանական կազմակերպությունների, ինչպես նաև ՇՄՆ էկոպարեկային ծառայության ներկայացուցիչները մեկտեղվեցին՝ ևս մեկ անգամ ընդգծելու կենսաբազմազանության պահպանության և անտառային տնտեսության կայուն զարգացման կարևորությունը։
Միջոցառման հանդիսավոր մասը բացեց ՊԳԿ-ի հայաստանյան ներկայացուցիչ Ռայմունդ Յելեն, ապա ուղերձներով
ու ելույթներով հանդես եկան Հայաստանում ՄԱԿ-ի մշտական համակարգող Ֆղանսուազ Ժակոբը, Շվեյցարիայի դեսպանատան առաքելության ղեկավարի տեղակալ Ուրսուլա Լյոբլին և այլոք։
Այսպիսով, բնության հանդեպ խորը հարգանքով և ապագա սերունդների առջև պատասխանատվության գիտակցումով տարբեր գերատեսչությունների ներկայացուցիչներ ու միջազգային գործընկեր կառույցների պաշտոնյաներ միավորվեցին ծառատունկի խորհրդանշական արարողության շուրջ։ «Համերաշխության ծառուղի» տանող քայլերթի ընթացքում ակնառու էր, որ Հայաստանում բնապահպանության ոլորտի գերակա շահագրգիռ սուբյեկտներն ամենաբարձր մակարդակով մասնակցում են գործընթացին՝ ամրապնդելով միջազգային համագործակցությունը տեղական նվիրումով։
Արարողության գագաթնակետը դարձավ անձամբ մասնակիցների կողմից տնկիների տնկումը «Համերաշխության ծառուղու» հողում։ Էկոպարեկային ծառայության պետի տեղակալներ Մուրադ Նուրիջանյանն ու Արուսյակ Սիրադեղյանն իրենց ձեռքերով տնկեցին երկու ծառ՝ մեկ փշատերև և մեկ լայնատերև, ի նշան հավերժության և կյանքի շարունակականության։
Պատկերասրահ
