Սյունիքի մարզային վարչությունում կայացել է բնության հատուկ պահպանվող տարածքների կառավարման մասնագիտացմանը նվիրված աշխատանքային հանդիպում

Այսօր՝ հուլիսի 11-ին, ՇՄՆ էկոպարեկային ծառայության Սյունքի մարզային վարչությունում անցկացվել է բնության հատուկ պահպանվող տարածքների կառավարման համակարգի մասնագիտացմանն ու ինստիտուցիոնալ զարգացմանը վերաբերող թեմատիկ աշխատանքային հանդիպում-քննարկում, որի մեկնարկային հանդիպումը կայացել էր Երևանում, սույն թվականի հուլիսի 9-ին՝ էկոպարեկային ծառայության պետի տեղակալներ Մուրադ Նուրիջանյանի, Արուսյակ Սիրադեղյանի, ծառայության գլխավոր քարտուղար Լուսինե Ալեքսանյանի, շրջակա միջավայրի նախարարության և էկոպարեկային ծառայության կենտրոնական ապարատի և մարզային ստորաբաժանումների, Բնության Համաշխարհային Հիմնադրամի հայաստանյան մասնաճյուղի (WWF Armenia) ներկայացուցիչների, ոլորտի շահագրգիռ այլ ներկայացուցիչների մասնակցությամբ։

Հանդիպումն այս անգամ էլ կազմակերպվել էր «Կենսաբազմազանություն և բնության հատուկ պահպանվող տարածքներ» ծրագրային բաղադրիչի շրջանակում՝ PROPARK ARII PROTEJATE SRL կազմակերպության ներգրավմամբ։

Հանդիպման նպատակն էր խորացնել մասնագիտական պատրաստվածությունն ու կարողությունները՝ կապված բնության հատուկ պահպանվող տարածքների կառավարման մասնագիտացման գործընթացների հետ։ Այս փուլում հենց մասնակիցներն էին գնահատում իրենց կարողությունները և պատկերացում կազմում ապագա զարգացման ուղղությունների վերաբերյալ։ Հատուկ շեշտադրվել է այն փաստը, որ բնության հատուկ պահպանվող տարածքների արդյունավետ կառավարումն այսօր արդեն պահանջում է ոչ միայն տեսական գիտելիքներ, այլ նաև հստակ չափելի կարողություններ ու հմտություններ։

Էկոպարեկային ծառայության ներկայացուցիչներն իրենց խոսքում ընդգծել են, որ ի թիվս այլնի, ծառայության առաքելությունն իր մեջ ամփոփում է նաև մասնագիտական առաջընթացի անընդհատ ապահովումը, համակարգի զարգացումը, մասնագետների պատրաստումը և գործնական լուծումների ներդրումը Հայաստանում։ Սա ոչ միայն պատասխանատվություն է, այլ նաև վստահության ձևավորման ու ամրապնդման քայլ ծառայության նկատմամբ՝ որպես համակարգի կայացման առանցքային օղակի։

Հանդիպման ամենաակտիվ և մասնակիցների կողմից ամենաշատ արձագանք ստացած փուլն ինքնագնահատման հատվածն էր։ Կարողությունների միջազգային մոդելի հիման վրա կազմված հարցաշարերը թույլ տվեցին մասնակիցներին դիտարկել սեփական մասնագիտական պրոֆիլներն՝ ավելի լայն համատեքստում։ Հատուկ առանձնացվել է այն հանգամանքը, որ ինքնագնահատումը ոչ թե ստուգում է, այլ հնարավորություն՝ տեսնելու ուժեղ կողմերը և աճի հնարավոր ուղիները։ PROPARK ARII PROTEJATE SRL կազմակերպության թիմն ապահովել է գործնական բացատրություններ յուրաքանչյուր փուլում, իսկ Էկոպարեկային ծառայության ներկայացուցիչների ակտիվ ներգրավվածությունն ու մասնագիտական մեկնաբանությունները քննարկմանը հաղորդել են հստակություն, նպատակայնություն և գործնական խորություն։

Հանդիպման եզրափակիչ հատվածում ևս մեկ անգամ կարևորվեց այն մոտեցումը, որ մասնագիտացումը պետք է լինի շարունակական, կարողությունների վրա հիմնված գործընթաց և Էկոպարեկային ծառայությունը պետք է շարունակի առաջնորդի իր դերը՝ ապահովելով համակարգված զարգացում և որակյալ մասնագիտական ներուժ։