Վլադիմիր Կիրակոսյանը և Լուսինե Ալեքսանյանը մասնակցել են Անտառների և անտառային արդյունաբերության հանձնաժողովի 82-րդ նիստի աշխատանքներին

ՀՀ ՇՄՆ Էկոպարեկային ծառայության պետ Վլադիմիր Կիրակոսյանը և ծառայության գլխավոր քարտուղար Լուսինե Ալեքսանյանը Շվեյցարական Համադաշնության Ժնև քաղաքում մասնակցել են Միավորված Ազգերի Կազմակերպության Տնտեսական և սոցիալական խորհրդի Եվրոպական տնտեսական հանձնաժողովի Անտառների և անտառային արդյունաբերության հանձնաժողովի 82-րդ նիստի աշխատանքներին, որոնք մեկնարկել են սույն թվականի նոյեմբերի 13-ին։

Նիստի ընթացքում քննարկվել են անտառային տնտեսության և շուկայի վերաբերյալ հարցեր, մասնավորապես այն արտադրատեսակների առևտրային հարցերի վերաբերյալ, որոնց արտադրությունը չի ենթադրում անտառհատումներ։

Ներկայացվել է նաև անտառային ապրանքների/արտադրանքի շուկայի վիճակի մասին հայտարարության նախագիծ։

Աշխատանքային խմբի հանդիպման երկրորդ օրվա օրակարգն առավել հագեցած էր։

Օրակարգով նախատեսված ձևաչափում հանձնաժողովի աշխատանքային ծրագիրը ներառում էր հետևյալ թիրախային կետերը․

• 2025 թվականի աշխատանքային ծրագիրը և 2026 թվականի աշխատանքային ծրագրի հիմնական բաղադրիչների վերաբերյալ առաջարկություններ,
• բորեալ անտառների (հյուսիսային կիսագնդի անտառներ) հետ կապված հարցեր, 
• քաղաքային անտառային տնտեսությունների հետ կապված հարցեր,
• անտառային տեղեկատվական համակարգեր,
• տեղեկատվական տվյալների ավտոմատացման թարմացումներ, 
• կլիմայի փոփոխությունը և անտառները Եվրոպական տնտեսական հանձնաժողովում ներառված երկրների տարածքում,
• հաղորդակցման գործունեությունը 2024 և 2025 թվականներին:

Առավել հեռանկարային և ռազմավարական նշանակության խնդիրներին հարող համապարփակ/համալիր աշխատանքային ծրագրի շրջանակներում անդրադարձ է կատարվել հետևյալ քայլերի արդյունավետ կազմակերպմանն ու իրացմանը․

2026-2029 թվականների աշխատանքի միասնական ծրագրի ուսումնասիրություններ/վերանայում,

Եվրոպաական տնտեսական հանձնաժողովի և ՄԱԿ-ի Պարենի և գյուղատնտեսության կազմակերպության (FAO) համատեղ աշխատանքային խմբի զեկույցը՝ անտառների վիճակագրության, տնտեսագիտության և կառավարման վերաբերյալ, համաշխարհային անտառային ռեսուրսների գնահատման ցիկլի և անտառների ու դրանց կայուն կառավարման վերաբերյալ տվյալների համատեղ հավաքագրման թարմացում 2025 թվականին՝ համաեվրոպական մակարդակով, անտառներին հասցվող վնասնի և անտառների վրա բացասաբար ազդող գործոնների գնահատման հաշվետվության ընթացքը:

Քարտուղարությունը թարմացրել է ներառական զարգացման և գենդերային ռազմավարություններն ու ներառել դրանք երկրների շուկայական հայտարարություններում:

Պատվիրակությունները Հանձնաժողովին տեղեկացրել են երիտասարդության, գենդերի, մարդու իրավունքների և հաշմանդամության իրավունքների ներառման աշխատանքների և անտառային տնտեսության իրենց ռազմավարությունների մասին:

Հանձնաժողովը.

• ողջունել է անտառային տնտեսությունում երիտասարդության, գենդերային հավասարության, մարդու իրավունքների և հաշմանդամություն ունեցող անձանց ներառմանը խթանող նախաձեռնությունները,
• ողջունել է անդամ պետությունների նախաձեռնությունները՝ 2025թ․ զեկուցումներին ընդառաջ։

Տեղեկացվել է նաև, որ Քարտուղարությունը պատվիրակներին կտեղեկացնի Խորհրդի համատեղ նիստի օրվա և տեղի մասին, որը հավանաբար տեղի կունենա 2025 թվականի նոյմեբերի 4-7-ը ներառյալ։