Վլադիմիր Կիրակոսյանը շնորհավորական ուղերձ է հղել
ՇՄՆ Էկոպարեկային ծառայության պետ Վլադիմիր Կիրակոսյանը շնորհավորական ուղերձ է հղել Հայաստանի Հանրապետության անկախության 34-րդ տարեդարձի առթիվ։ Ուղերձում մասնավորապես ասված է․
«Սիրելի հայրենակիցներ,
Սեպտեմբերի 21-ը մեր անկախ պետականության հիմնասյուներից է, այն օրը, երբ ժողովուրդն իր կամքով ընտրեց ազատ ու ինքնիշխան ապագա։ Այս օրը ոչ միայն պատմական հիշողություն է, այլև մեր հասարակական-քաղաքական կյանքի ուղենիշ։
Այսօր լրանում է Հայաստանի Հանրապետության անկախության 34-րդ տարեդարձը։ Միանշանակ և աներկբա է, որ 1991 թվականի սեպտեմբերի 21-ին «Այո» ասող եթե ոչ բոլոր քաղաքացիները, ապա գոնե նրանց մեծամասնությունը, լավ հասկանում էր, որ դա պարզապես քվեաթերթիկի վրա գրչով արված նշում չէ, այլ սահմանագիծ, որից այս կողմ հպատակը դառնում է Քաղաքացի, Հայրենիքը դառնում է Պետություն, իսկ կարգախոսը` Պատասխանատվություն։
Մենք այսօր ապրում ենք այնպիսի իրականության մեջ, որտեղ անկախության պահպանման ու ամրապնդման հիմնական երաշխիքը ժողովրդավարությունն է, իրավունքի գերակայությունը և մեր քաղաքացիների գիտակցված ընտրությունը։
Այս արժեքներն են, որ մեր հասարակության առաջնային ձեռքբերումներն են և դառնալու են ապագա Հայաստանի կայուն ու անշրջելի զարգացման հիմքը։
Անկախության օրը նաև պատասխանատվության օր է․ պատասխանատվություն յուրաքանչյուրիս վրա՝ մեր երկրի առաջընթացի, հասարակական համերաշխության ու խաղաղ ապագայի համար։ Մեր պետական ուղեգիծն ու ազգային ընթացքը հենց այդ ճանապարհով է առաջնորդվում՝ որդեգրելով թափանցիկ կառավարում, արդարություն և քաղաքացիների իրավունքների պաշտպանություն։
Սիրելի հայրենակիցներ, վստահ եմ, որ միասին կարող ենք պաշտպանել մեր անկախությունը ոչ միայն արտաքին մարտահրավերներից, այլև ներքին թուլությունից՝ կառուցելով ուժեղ, ինքնավստահ և ժամանակակից Հայաստան։
Շնորհավոր անկախության տոնը։
Կեցցե անկախ Հայաստանի Հանրապետությունը»։