Անտառային կոմիտեի նախագահ Վլադիմիր Կիրակոսյանը, կոմիտեի նախագահի առաջին տեղակալ Վարդան Սարգսյանը և «Հայանտառ» ՊՈԱԿ-ի տնօրեն Սևակ Մարկոսյանն այսօր աշխատանքային այցով եղել են Լոռու մարզում։

Մարզպետ Արամ Խաչատրյանի հետ հանդիպման ընթացքում քննարկվել են ապօրինի անտառահատումների կանխարգելմանը, անտառտնկման և անտառվերականգնման աշխատանքներին, ազգաբնակչությանը թափուկի տրամադրմանը, ինչպես նաև ոլորտային մի շարք առաջնահերթություններին վերաբերող հարցեր։

Ողջունելով ներկաներին՝ Խաչատրյանը շնորհակալություն է հայտնել Անտառային կոմիտեին Լոռու մարզպետի աշխատակազմի հետ մշտապես սերտ և արդյունավետ համագործակցելու համար և ընդգծել, որ Լոռու մարզպետի աշխատակազմը խիստ կարևորում է անտառպահպանության հարցերը և ամեն կերպ աջակցում բնապահպանական խնդիրների մեղմմանն ուղղված բոլոր նախաձեռնություններին ու միջոցառումներին:

Հանդիպում-քննարկմանը մասնակցել են նաև Լոռու մարզպետի տեղակալ Գոռ Ասրյանը, աշխատակազմի գյուղատնտեսության և շրջակա միջավայրի պահպանության վարչության պետ Արուս Թումանյանը, պատասխանատու այլ պաշտոնյաներ:

Անտառային կոմիտեի նախագահ Վլադիմիր Կիրակոսյանն իր խոսքում ևս խիստ կարևորել է իր ղեկավարած կառույցի և մարզպետարանի սերտ համագործակցությունը և ընդգծել, որ բազմիցս համոզվել է՝ հենց այդ և պատասխանատու այլ կառույցների համագործակցված աշխատանքի և ջանքերի շնորհիվ է հնարավոր հասնել ցանկալի արդյունքի։

Կիրակոսյանը նաև նշել է, որ Հայաստանի անտառների 62 տոկոսը Լոռու և Տավուշի մարզերի տարածքներում են, հետևաբար ապօրինի անտառահատումների ծավալներն այս մարզերում ամենամտահոգիչն են:

«Այս և նմանատիպ ապօրինությունները կանխարգելելու միտումով էլ նախաձեռնվել է պահպանության ծառայության ստեղծումը»,-ասել է կոմիտեի նախագահը։

Հանդիպման ընթացքում ներկայացվել են Լոռու մարզում 2023 թվականի ընթացքում կատարված աշխատանքները և այդ համատեքստում կարևորվել է մարզում անտառպատման աշխատանքների ողջ ծավալով և արդյունավետ կատարումը։